Gen 9 | ZomZIV | STEP | Tua ciangin Pasian in Noah le a tapate thupha pia in amaute tungah, “Cipha-in pung unla tampi pha-in leitung dim un.

Genesis 9

Noah tawh Pasian’ Thukhun

1 Tua ciangin Pasian in Noah le a tapate thupha pia in amaute tungah, “Cipha-in pung unla tampi pha-in leitung dim un. 2 Leitung ganhing khempeuh, huihlak vasa khempeuh leitunga a bokvak ganhing peuhmah le tuipi ngasa khempeuh in note hong kihta in hong zahtak ding uh hi; note khut sungah tuate hong kipia hi. 3 A nungta a gamtang na khempeuh na an ding uh ahi hi. Kung hingte note kong piak bang tektek in tu-in na khempeuh note kong pia hi. ^a

4 “Ahi hangin a nuntakna sisan, a sunga om laisiah a sa na ne peuhmah kei ding uh hi. 5 Note nuntakna sisan tangin sisan mah ka kal teitei dinga, ganhingte khatpeuh tungah zong ka kal ding hi. Mikim tungah zong a mihing nuntakna mah ka kal ding hi. ^b

6 “Mihing sisan suah peuhmah,
mi mah in amah sisan suah ding hi. ^c
Ahang in, Pasian lim sunin
Pasian in mi a bawlsa ahi hi. ^d

7 Note na hi uh leh cipha unla pungin tampi pha un; leitungah kibehlapin pung un,” ci hi.

8 Tua ciangin Pasian in Noah le amah tawh a omkhawm a tapate tungah, 9 “Tu-in note le note nunga na suan-le-khakte uh, 10 le note tawh a omkhawm a nungta ganhing khempeuh - vasate, innsate le gamsate khempeuh gunkuangpi sung pana note tawh a paikhia - leitunga nuntakna a nei peuhmah, tawh ka thukhun ka bawl hi. 11 Note tawh thukhun ka bawl hi: Nuntakna nei khempeuh tuiciin tunna tawh ki beisak kik nawn lo ding hi; leitung susia dingin tuiciin a tung kik nawn kei ding hi,” a ci hi. ^e

12 Tua ciangin Pasian in, “Hih in no le note tawh a om a nungta ganhingte khempeuh kikalah mailama khangte khempeuh adingin thukhun ka bawlna lim ahi hi: 13 Ka sakhituihup meii lakah ka kaisak hi. Tua pen kei le leitung thuciamna lim hi ding hi. 14 Leitungah meii ka kaisak a meii lakah sakhituihup a kilat peuhpeuh ciangin 15 note le a nungta ganhing namte khempeuh le kei kikal-a ka thukhun ka phawk ding hi. Nuntakna khempeuh a susia dingin leitungah tuiciin a tung kik nawn kei ding hi. 16 Meii lakah sakhituihup a kilat simin ka mu dinga Pasian le leitunga om a nungta ganhing nam khempeuh kikalah a kip tawntung thukhun ka phawk ding hi,” ci hi.

17 Pasian in Noah kiangah, “Hih in kei le leitunga nungta khempeuh kikala thukhun lim ahi hi,” ci hi. ^f

Noah Tapate

18 Gunkuangpi sung pan a paikhia Noah’ tapate Shem, Ham le Japheth ahi hi. (Ham pen Canaan’ pa ahi hi.) 19 Hihte Noah tapa thumte hi a, amaute panin leitung khempeuha kizel mite a piang ahi hi. ^g

20 Lokhomipa Noah in lenggui huan khat bawl ^{▼▼9.20 Ahikeh a masa lei hoih} hi. 21 Tua pana piang lenggahzu a dawn ciangin khama, a buk sungah puansilh loin a lum hi. 22 Canaan’ pa Ham in a pa guaktang-a om mu-a a pua-a om a sanggam nihte kiangah ko hi. 23 Ahi hangin Shem le Japheth in puan khat la in a liangko uah bang uh a, nung-le-pai in a pa uh guaktanga om a khuh uh hi. A pa uh guaktangna a muh loh nadingun a lehngat uh hi. ⁱ

24 Noah a lenggahzu kham na pan a tei ciangin a tapa tum pen in ama tunga a bawlna a theih ciangin 25 amah in,

“Canaan in hamsiatna thuak ta hen! ^j
A sanggamte adingin
sila niam pen hi ta hen,” ci hi.

26 Amah in,

TOPA, Shem’ Pasian in thupha ngah ta hen!
Shem’ sila in Canaan omsak ta hen. ^{▼▼9.26 Ahikeh amah sila hi hen.
,} ^l
27 Pasian in Japheth ^{▼▼9.27 Japheth pen Hebrew ah kizan cih tawh a aw kibang hi.} gam khangsak hen; ⁿ
Shem’ bukte sungah Japheth tengsak henla, ^o
ama ^{▼▼9.27 Ahikeh amau} sila-in Canaan omsak hen,” zong ci hi.

28 Tuiciin tun nung, Noah kum 350 nungta lai hi. 29 Noah a nuntak sung khempeuh kum 950 hi a, tua khit ciangin a si hi. ^q